រាជធានីភ្នំពេញ ៖ ចាត់ទុកថាជាសំណាងមួយក្នុងចំណោម១ពាន់គ្រោះថ្នាក់ ដែលមានយុវជន៣នាក់ ផឹកស្រវឹងធ្លាក់ភ្នែក ហើយបានជិះម៉ូតូ១គ្រឿងឌុបគ្នាក្នុងល្បឿនលឿន លុះពេលទៅដល់ត្រង់ចំណុចផ្លូវកោង និងងងឹតផង បត់មិនទាន់បានរេចង្កូត ជ្រុលទៅបុកគំនរសំបកដូង ដែលគេគរទុកចោលនៅក្បែរចិញ្ចើមផ្លូវមួយកន្លែង រួចក៏បានរអិលជ្រុលធ្លាក់ចូលទៅទឹកក្រោមស្ពានកម្ពស់ប្រហែលជាង១០ម៉ែត្រទាំងកំរោលតែម្ដង។ ប៉ុន្តែសំណាងល្អមិនបានបណ្ដាលឲ្យពួកគេទាំងនោះស្លាប់ឡើយ គ្រាន់តែរងរបួសធ្ងន់ម្នាក់ និងស្រាលតែប៉ុណ្ណោះ ហើយត្រូវបាននគរបាល បញ្ជូនទៅសង្គ្រោះបន្ទាន់ទាំងយប់ រីឯម៉ូតូរហូតដល់ព្រឹកឡើង ទើបស្ទូចយកចេញពីកន្លែងកើតហេតុ។
ឧប្បត្តិហេតុនេះបានកើតឡើង កាលពីវេលាម៉ោង៣យទាបភ្លឺ ថ្ងៃទី២២ ខែមិថុនា ឆ្នាំ២០១៧នៅ ផ្លូវជាតិលេខ៣ ត្រង់ចំណុចស្ពាន៧មករា ស្ថិតក្នុងភូមិទឹថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ជាប់ព្រំប្រទល់ស្រុកកណ្ដាលស្ទឹង ខេត្តកណ្ដាល។ យុវជនរងគ្រោះខាងលើនោះត្រូវបានគេស្គាល់ ១,ឈ្មោះ ទូន សុឃាម អាយុ២១ឆ្នាំ,២,ឈ្មោះ សុច ដារ៉ា អាយុ១៩ឆ្នាំ,៣,ឈ្មោះ លីន ណា អាយុ២៤ឆ្នាំ អ្នកទាំង៣នាក់នោះមានមុខរបរជាកម្មករស្លដែក ស្នាក់នៅក្នុងភូមិអូរអណ្ដូង សង្កាត់ក្រាំងពង្រ ខណ្ឌដង្កោ និងមានស្រុកកំណើតនៅភូមិខ្នារធំ ឃុំពារាម ស្រុកបាទី ខេត្តតាកែវ ពេលនេះអ្នករបួសធ្ងន់ម្នាក់កំពុងសម្រាកព្យាបាលរបួសនៅមន្ទីរពេទ្យព្រះកុសុមៈ។
តាមប្រភពព័ត៌មានបានឲ្យដឹងថា នៅមុនពេលកើតហេតុ យុវជន៣នាក់នោះបានជិះម៉ូតូ១គ្រឿង ម៉ាកម៉ូតូ ហុងដាឌ្រីមសេ១២៥ ពណ៌ខ្មៅពាក់ស្លាកលេខភ្នំពេញ1B-W6047 ឌុបគ្នាចេញពីកន្លែងផឹកស៊ីមួយកន្លែង ដោយធ្វើដំណើរក្នុងស្ថានភាពស្រវឹង ក្នុងទិសដៅពីត្បូងទៅជើង ក្នុងល្បឿនលឿនគួរសមដែរ។ លុះពេលទៅដល់ត្រង់ចំណុចកើតហេតុខាងលើ ដែលជាផ្លូវកោងផង និងយប់ងងឹងផងគួបផ្សំនឹងការស្រវឹងធ្លាក់ភ្នែកផងនោះ កាច់ចង្កូតបត់មិនទាន់ ក៏បានជ្រុលទៅបុកគំនរសំបកដូង ដែលអ្នកលក់ដូងនៅទីនោះគរទុកចោលនៅតាមចិញ្ចើមផ្លូវ។ បណ្ដាលឲ្យជ្រុលធ្លាក់ចូលទៅក្នុងទឹកក្រោមស្ពាន៧មករា ទាំងកំរោលប៉ុន្តែសំណាងល្អមិនបានបណ្ដាលឲ្យអ្នកទាំង៣នាក់នោះ ស្លាប់បាត់បង់ជីវិតឡើយ គ្រាន់តែរងរបួសធ្ងន់ម្នាក់ និងស្រាល២នាក់តែប៉ុណ្ណោះ។
ប្រភពដដែលបានបន្តថា ក្រោយពេលកើតហេតុនគរបាលប៉ុស្ដិ៍ក្រាំងពង្រ បានចុះទៅកាន់កន្លែងនោះហៅរថយន្តសង្គ្រោះដឹកអ្នករបួសធ្ងន់ទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់ ចំណែកម៉ូតូបានរងការខូចខាតយ៉ាងដំណំ និងត្រាំក្នុងទឹកស្ទឹងព្រែកត្នោត ក្រោមស្ពាន៧មករា នោះពេញមួយយប់តែម្តង រហូតដល់ព្រឹកឡើងទើបនគរបាល ហៅរថយន្តស្ទូចទៅស្ទូចយកចេញពីក្រោមស្ពាន យកទៅរក្សាទុកនៅអធិការដ្ឋាននគរបាលខណ្ឌដង្កោ ដើម្បីប្រគល់ឲ្យម្ចាស់យកទៅធ្វើការជួសជុលឡើងវិញដោយខ្លួនង៕
សូមទស្សនាវីដេអូខាងក្រោម!
About the Author
