ខេត្តសៀមរាប ៖ សពរបស់លោកអនុសេនីយ៍ទោ អ៊ឹម សំ ទាហានមួកខៀវកម្ពុជាដែលបានពលីជីវិតក្នុងពេលបំពេញបេសកកម្មមនុស្សធម៌ ក្រោមឆត្រអង្គការសហប្រជាជាតិនៅសាធារណរដ្ឋអាហ្វ្រិកកណ្តាលត្រូវបានធ្វើមាតុភូមិនិវត្តន៍មកដល់គេហដ្ឋាននៃសពវិញកាលពីវេលាម៉ោង២និង៤៥នាទីរំលងអធ្រាត្រឈានចូលថ្ងៃទី២២ ខែឧសភា ឆ្នាំ២០១៧ ដោយមានការរងចាំទទួលពីសំណាក់ញាតិមិត្តជិតឆ្ងាយនៃសព និងអាជ្ញាធរ កម្លាំងសមត្ថកិច្ចមូលដ្ឋាន នៅភូមិកំពង់ក្តី ឃុំកំពង់ក្តី ស្រុកជីក្រែង ខេត្តសៀមរាប ។ លុះនៅព្រឹកថ្ងៃទី២២ ខែឧសភា ឆ្នាំ២០១៧ នោះដែរលោកបណ្ឌិត ឃឹម ប៊ុនសុង អភិបាលនៃគណៈអភិបាល ខេត្តសៀមរាប និងលោកបណ្ឌិត នូ ផល្លា ប្រធានក្រុមប្រឹក្សាខេត្តបានដឹកនាំគណៈប្រតិភូខេត្តអញ្ជើញចូលរួមរំលែកនូវមរណៈទុក្ខជាមួយគ្រួសារសព និងគោរពវិញ្ញាណក្ខន្ធលោកអនុសេនីយ៍ទោ អ៊ឹម សំ ទាហានមួកខៀវកម្ពុជាដែលបានពលីជីវិតបន្ទាប់ពីមានការវាយប្រហារដោយក្រុមឧទ្ទាម ទៅលើក្បួនយុទ្ធដំណើររបស់កម្លាំង Minusca របស់អង្គការសហប្រជាជាតិកាលពីយប់ថ្ងៃទី៨ ខែឧសភា ឆ្នាំ២០១៧នៅអាហ្វ្រិកកណ្តាល ។
ក្នុងនោះដែរលោកបណ្ឌិត ឃឹម ប៊ុនសុង និងគណៈប្រតិភូក៏បានធ្វើការបូជាទៀនធូក និងស្នឹងស្នាត ដើម្បីឧទ្ទិសជូនដល់វិញ្ញាណក្ខន្ធរបស់លោកអនុសេនីយ៍ទោ អ៊ឹម សំ ដែលជាវីរៈយុទ្ធជនដែលបានបូជាជីវិតក្នុងបុព្វហេតុរក្សាសន្តិភាពជូនដល់ប្រជាជាតិលើពិភពលោកសូមឲ្យបានទៅកាន់សុខគតិភពថ្មី ព្រមទាំងបែរងាកក្រោយឲ្យពរជ័យដល់ក្រុមគ្រួសារ បងប្អូនកូនចៅ និង ថ្នាក់ដឹកនាំគ្រប់ជាន់ថ្នាក់ និងយុទ្ធមិត្តរួមការងារឲ្យទទួលនូវសេចក្តីសុខ និងឲ្យស្គាល់នូវតែសុខសន្តិភាព សុភមង្គល និងការអភិវឌ្ឍន៍ប្រទេសជាតិលើគ្រប់វិស័យក៏ដូចជាការបំពេញបេសកកម្មមនុស្សធម៌អន្តរជាតិ ។លោកបណ្ឌិត និងប្រតិភូទាំងអស់ បានសម្តែងនូវការសោកស្តាយចំពោះវីរៈភាពរបស់លោកអនុសេនីយ៍ទោ អ៊ឹម សំ ដែលបានឃ្លាតទៅឆ្ងាយពីក្រុមគ្រួសារ ប្រពន្ធ កូន ឪពុកម្តាយ និងមាតុប្រទេស ក្នុងបុព្វហេតុរក្សាសន្តិភាពជូនប្រជាជាតិលើកពិភពលោក និងបានរំលែកទុក្ខជាមួយក្រុមគ្រួសារនៃសពក្នុងការបាត់បង់អាយុជីវិតប្តី កូន ឪពុក ដែលជាទាហានមួកខៀវកម្ពុជាក្រោយមានការវាយហារលើក្បួនកម្លាំងរបស់អង្គការសហប្រជាជាតិនៅសាធារណរដ្ឋអាហ្វ្រិកកណ្តាល ។
ក្នុងឱកាសនោះលោកបណ្ឌិត ឃឹម ប៊ុនសុង បានចូលរួមជាមួយភរិយានៃក្រុមគ្រួសារសពនូវថវិកាចំនួន៨លានរៀល ដើម្បីសម្រាប់ប្រើប្រាស់ក្នុងពិធីបុណ្យសពផងដែរ ។ ក្នុងពិធីគោរពវិញ្ញាណក្ខន្ធសពលោកអនុសេនីយ៍ទោ អ៊ឹម សំ ក៏មានវត្តមានលោក លោកជំទាវ អស់លោក លោកស្រី ជាមេបញ្ជាការ បញ្ជាការកងវិស្វកម្មកងយោធពលខេមរភូមិន្ទ យោធភូមិភាគទី៤ តំបន់ប្រតិបត្តិការសិករងសៀមរាប កងរាជអាវុធហត្ថខេត្ត ថ្នាក់ដឹកនាំមន្ទីរ អាជ្ញាធរក្រុង ស្រុកនិងសមាជិកសមាជិកាគណបក្សប្រជាជន ស្រុកជីក្រែងផងដែរ ។ ក្នុងនោះដែរភរិយានៃសពលោកអនុសេនីយ៍ទោ អ៊ឹម សំ ក៏ដូចឪពុកម្តាយបង្កើតនៃសពបានសម្តែងអំណរគុណចំពោះការយកចិត្តទុកដាក់ដ៏ខ្ពង់ខ្ពស់របស់សម្តេចតេជោ ហ៊ុនសែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ក៏ដូចជារដ្ឋមន្ត្រីក្រសួងការពារជាតិ និងអាជ្ញាធរខេត្ត និងក្រុង ស្រុក ដែលបានចូលរួមរំលែកទុក្ខនៃក្រុមគ្រួសារសព និងការរៀបចំពិធីបុណ្យទៅតាមប្រពៃណីសាសនាផងដែរ ៕
About the Author
